Խաղով Բարով

Շատ անգամ չէ որ թատերական բեմադրութիւն մը հայերէն լեզուով կը ծնի, մանաւանդ երբ թատերախումբը այսօրուան ֆրանսահայ պատանիներով կազմուած է :

Այս բախտաւոր հազուադիպութիւնը աշխուժութեամբ կատարուեցաւ, Ալֆողվիլի Սուրբ Մեսրոպ ամենօրեայ կրթարանի նախկին աշակերտներու կողմէ : Իրենց գոլէժ Սէնթ Թերեզի հայերէն լեզուի ուսուցչուհիին առաջնորդութեամբ՝ Տիկին Ռոզին Թաշճեան–Ադամեան : Արդէն թատերախաղ մը մեծ յաջողութեամբ  կատարած էին, առաջին անգամ ըլլալով Յունիսին, Սուրբ Մեսրոպ կրթարանի սրահին մէջ : Դիտողներուն հաճոյքը  զիրենք այնքան քաջալերեց, որ փորձը ամպայման կրկնել ուզեցին : Հետեւաբար կիրակի Նոյեմբեր 28ին, իրենց կատակերգական  բոլոր ուժերով, 10-12 տարեկան պատանիները Փարիզի Բարեգործականի բեմը տաքցուցին նոր խաղով մը :

Յակոբ Պարոնեանի եւ Յակոբ Թորոսեանի երկու կարճ հատուածներու երգիծական յարմարեցումով մը, որպէսզի 15 կամաւոր աշակերտները կարենան դեր մը ունենալ, ծիծաղը տիրեց բոլորին համար : Այս առիթովն ալ արտասանութեան սովորութիւնը երկու ոտանաւորներով, նշանաւոր բանաստեղծներ վերերեւցուց՝ Մ. Իշխան եւ Հ. Շիրազ :

Այս բոլորը միասին, այնքան զուարթ տպաւորութիւն եւ ուրախութիւն գործեց հանդիսականներուն վրայ, որ հաճելի անակնկալ մը եղաւ կրկին :

Նիւթերէն աւելի, յատկապէս նկատելի էր  աշակերտներու բուռն խանդավառութիւնը  հայերէնով արտայայտուելու : Ինչ որ այժմեական Հայերու կացութեան մէջ, ուրիշ տեսողութիւն մըն է՛ ուր մայրենի լեզուն աւելի գրաւիչ կ’երեւի :

Նաեւ գեղեցիկ օրինակ մըն է որ ուսումը, երբ կեանքի զանազան ուրիշ գործողութիւններով շփում ունի, յայտնի արդիւնք կրնայ բերել : Արդէն  բեմադրող հայերէն լեզուի ուսուցչուհիին նպատակը  սա էր՝ լեզուն  ՝զարգացնել եւ սիրցնել՝ : Եւ ուրեմն 15 աշակերտները սիրով հետեւեցան, ու ՝Չքնաղ իմ երկիր նայիրեան՝ երգովը վերջացուցին :

Այս շատ հաճելի եւ ջերմ ներկայացումը, որ բնականաբար հայ մշակոյթի գովքն էր, ոչ միայն ծնողներուն, բայց այլ ամենուս համար գնահատելի է :

Ժիլտա Խաչիկողլու